सेंचुरियन । चहल केरऽ चंगुल म॑ फंसी क॑ दक्षिण अफ्रिका अपनऽ दोसरऽ वन डे मैच भी हारी गेलऽ छै । ई जीत के साथ ६ मैच केरऽ ई श्रृंखला म॑ २-० सें बढ़त लै के साथ-साथ भारत न॑ मेजबान क्रिकेट टीम प॑ सबसें बड़ऽ जीत हासिल करलकै ।

कलाई केरऽ जादूगर युजवेंद्र चहल आरू कुलदीप यादव एक दफा फिर दक्षिण अफ्रीका लेली बुरा सपना साबित होलै । चहल न॑ ५ /२२, आरू कुलदीप न॑ ३/२० अफ्रीकी बल्लेबाज क॑ फिरकी केरऽ जाल म॑ उलझाय क॑ पवेलियन केरऽ रस्ता देखैलकै ।

नतीजा ई होलै कि पहलें बैटिंग करै लेली मैदान म॑ उतरलऽ मेजबान टीम अपनऽ धरती प॑ अपनऽ निम्नतम स्कोर (११८) प॑ सिमटी गेलै । ई आसान लक्ष्य क॑ भारतीय बल्लेबाज न॑ खाली १ विकेट गँवाय क॑ २१ वाँ ओवर म॑ हासिल करी लेलकै ।

चहल न॑ २२ रन द॑ क॑ पांच विकेट लेलकै जे दक्षिण अफ्रीका में कोय भी लेग स्पिनर केरऽ सर्वश्रेष्ठ प्रदर्शन भी छै । एकरऽ पहल॑ अपनऽ धरती प॑ दक्षिण अफ्रीका केरऽ न्यूनतम स्कोर ११९ रन छेलै जे हुनी इंग्लैंड के खिलाफ २००९ म॑ पोर्ट एलिजाबेथ म॑ बनैल॑ छेलै ।

Comments are closed.

error: Content is protected !!