नई दिल्ली : केंद्र सरकार केरऽ एगऽ हाईलेवल कमेटी न॑ बिहार केरऽ दू प्रमुख भाषा- भोजपुरी आरू अंगिका क॑ संविधान केरऽ आठमऽ अनुसूची मं॑ शामिल नै करै के सिफ़ारिश करन॑ छै. यानी इ भाषा सीनी क॑ फिलहाल राजभाषा केरऽ दर्जा दै सं॑ इनकार करन॑ छै. केंद्र केरऽ इ फैसला सं॑ बिहार के विधानसभा चुनाव पर भी असर पड़॑ सकै छै, इ चुनाव इह॑ साल के आखिर मं॑ होय वाला छै. बिहार मं॑ बोललऽ जाय वाला तेसरऽ प्रमुख भाषा मैथिली आठवीं अनुसूची मं॑ पहलै सं॑ शामिल छै.

होतं॑ रहलऽ छै डिमांड
भोजपुरी आरू अंगिका वू 38 भाषा मं॑ स॑ छै जेकरऽ आठमऽ अनुसूची मं॑ शामिल करै के मांग संसद मं॑ आरू दोसरऽ मंचऽ पर लगातार उठतें रहलऽ छै. सरकार न॑ इह॑ साल जनवरी मं॑ इ मांगऽ के जांच लेली होम मिनिस्ट्री मं॑ अतिरिक्त सचिव बी.के. प्रसाद केरऽ अध्यक्षता मं॑ एगऽ हाई लेवल कमेटी बनैल॑ रहै. जेकरा म॑ होम मिनिस्ट्री, कल्चरल मिनिस्ट्री, एचआरडी, लॉ मिनिस्ट्री, साहित्य अकादमी, राजभाषा विभाग आरू केन्द्रीय भारतीय भाषा संस्थान आरू रजिस्ट्रार जनरल ऑफ़ इंडिया केरऽ सीनियर अफसर रहै.

की कहलऽ गेलऽ छै रिपोर्ट मं॑
पिछला महीना होम मिनिस्ट्री क॑ सौंपलऽ आपनऽ रिपोर्ट मं॑ इ कमेटी न॑ आठमऽ अनुसूची मं॑ मौजूद 22 भाषा सीनी क॑ शामिल करै के प्रोसेस आरू मापदंडों क॑ सही नै मानलै छै. कमेटी न॑ इ भी कहन॑ छै कि इ भाषा सीनी क॑ शामिल करला सं॑ हिंदी केरऽ विकास पर प्रभाव पड़तै.

अंगिका भाषा सथें होय रहलऽ सौतेला व्यवहार बर्दाश्त सं॑ बाहर 
अखिल भारतीय अंग-अंगिका विकास मंच (अभाअंअंविम) के कहना छै जे केंद्र सरकार केरऽ इ फैसला सं॑ बिहार, झारखंड आरू पश्चिम बंगाल के सब मिलाय क॑ पाँच करोड़ सं॑ भी जादा अंगिकाभाषी आरू ओकरऽ भाषा अंगिका के अपमान होलऽ छै. अंगिका भाषा सथें होय रहलऽ सौतेला व्यवहार बर्दाश्त सं॑ बाहर होय रहलऽ छै. अंगिका खाली क्षेत्रीय भाषा ही नै छेकै बल्कि नेपाल मं॑ उपयोग होय रहलऽ एगऽ अंतरराष्ट्रीय भाषा छेकै.  अभाअंअंविम केरऽ कुंदन अमिताभ न॑ आशा व्यक्त करन॑ छै जे केंद्र सरकार जल्द ही अंगिका के पक्ष मं॑ निर्णय ल॑  क॑ एकरा संविधान केरऽ आठमऽ अनुसूची मं॑ शामिल करतै.

अंग उत्थानान्दोलन समिति (अंगुआस) न॑ केंद्र सरकार केरऽ निर्णय क॑ दुर्भाग्यपूर्ण बतैनै छै. अंगुआस केरऽ केंद्रीय अध्यक्ष गौतम सुमन न॑ कहलकै कि अंगिका क॑ संविधान केरऽ आठमऽ अनुसूची मं॑ शामिल कराबै के माँग क॑ ल॑ क॑ आगामी 7 नवंबर – 2015 क॑ दिल्ली मं॑ धरना देलऽ जैतै.

इ भोजपुरी आरू अंगिका के अपमान छेकै 
दोसरऽ तरफ, जनता दल (यू) केरऽ राष्ट्रीय महामंत्री केसी त्यागी के कहना छै कि केंद्र केरऽ भाजपा सरकार भोजपुरी आरू अंगिका भाषी सीनी के अपमान करी रहलऽ छै. भोजपुरी खाली क्षेत्रीय भाषा ही नै छेकै बल्कि पचास सं॑ ज्यादा देशऽ मं॑ इस्तेमाल होय रहलऽ अंतरराष्ट्रीय भाषा छेकै. भारत केरऽ सभ प्रदेशऽ मं॑ भोजपुरी आरू अंगिका भाषी रहै छै. जोन भाजपा न॑ मैथिल ब्राह्मणऽ के वोट लेली 2004 चुनाव सं॑ ठीक पहले मैथिली क॑ राजभाषा बनाय दै छै वही भोजपुरी आरू अंगिका क॑ इ दर्जा कैन्हे नै दै ल॑ चाहै छै. हम्में मैथिली क॑ राजभाषा बनाबै के खिलाफ नै छियै लेकिन भोजपुरी आरू अंगिका केरऽ अपमान क॑ हम्में चुनावी मुद्दा बनैबै.

अंगिका बोलऽ - अंगिका पढ़ऽ - अंगिका लिखऽ

अंगिका बोलऽ – अंगिका पढ़ऽ – अंगिका लिखऽ

सिफ़ारिशऽ पर उचित कार्रवाई होतै -राजनाथ सिंह
केंद्रीय गृहमंत्री राजनाथ सिंह न॑ भास्कर सं॑ बातचीत मं॑ मानन॑ छै कि समिति न॑ अपनऽ रिपोर्ट सौंपी देन॑ छै. लेकिन साथ ही इ भी जोड़न॑ छै कि अभी तलक हुनी ओकरा देखन॑ नै छै. “जब रिपोर्ट सामना मं॑ लानलऽ जैतै त॑ ओकरऽ सिफ़ारिशऽ पर उचित कार्रवाई करलऽ जैतै”, हुनी कहलकै . चूँकि अभी तलक इ मामला पर बनलऽ तीन समितियऽ के रिपोर्टऽ के सिफ़ारिश सरकार न॑ जस के तस लागू करी देन॑ छै, मानलऽ जाय रहलऽ छै कि प्रसाद कमेटी के सिफ़ारिश क॑ भी मूल रूप मं॑ ही लागू करी देलऽ जैतै. लेकिन चूँकि बिहार चुनाव मं॑ अब॑ महज चार महीना ही शेष छै, केंद्र सरकार राजनीतिक रूप सं॑ संवेदनशील इ रिपोर्ट क॑ चुनाव  बाद ही लागू करतै.

(दैनिक भास्कर 14 जुलाई-2015 मं॑ छपलऽ समाचार -http://www.bhaskar.com/news-ht/NAT-NAN-centre-committee-denis-bhojpuri-and-angika-in- eighth-schedule-of-the-constitutio-5052064-NOR.html आरू Angika.com क॑ मिललऽ इनपुट पर आधारित)

 

Tags: , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , , ,

Comments are closed.