नई दिल्ली । इंटरनेट यूजर्स लेली एगो खुशखबरी वाला खबर छै । अब खाली एक रुपया म॑ अनलिमिटेड डाटा के सुविधा मिलै वाला छै । भारत संचार निगम लिमिटेड के साथ करार करै वाली डाटाविंड कंपनी न॑ मोबाइल आरू ब्राडबैंड ग्राहकऽ क॑ ई सुविधा दै के पहल करी रहलऽ छै ।

फरवरी महीना सें शुरु होतै सेवा
कंपनी केरऽ प्रमुख सुनीत सिंह तुली केरऽ अनुसार एकरा ल॑ क॑ बीएसएनएल स॑ करार करलऽ जाय चुकलऽ छै आरू ई महीना केरऽ मध्य तलक ई सेवा शुरू करलऽ जैतै । हुनी कहलकै कि एकरा लेली कंपनी केरऽ पेंटेंट ऐप ‘मेरानेट’ केरऽ उपयोग करलऽ जैतै । ई स्कीम सें यूजर्स क॑ 1 रुपया प्रतिदिन के हिसाब स॑ अनलिमिटेड इंटरनेट दै के घोषणा करलऽ गेलऽ छै ।

इंडोनेशिया म॑ होय चुकलऽ छै लॉन्च
हुनी बतैलकै कि ई ऐप क॑ सबसें पहल॑ इंडोनेशिया में लॉंच करलऽ गेलऽ छै जहाँ ग्राहकऽ सें बेहतर रेसपोंस मिली रहलऽ छै । मेरानेट नया प्रौद्योगिकी प॑ आधारित छै आरू एकरा म॑ इंटरनेट प॑ आबै वाला फाइलऽ क॑ कंप्रेस्ड करी क॑ बहुत छोटा करी देलऽ जाय छै,लेकिन ओकरऽ गुणवत्ता पर कोय असर नै परै छै ।

BSNL प॑ करतै काम
तुली न॑ कहलकै कि भारत म॑ अभी ई ऐप बीएसएनएल केरऽ नेटवर्क पर काम करतै आरू जब॑ ई ऐप केरऽ उपयोग करलऽ जैतै त॑ ग्राहक के डाटा के उपयोग नै होतै बल्कि मेरानेट केरऽ डाटा खर्च होतै । एकरा लेली बीएसएनएल सें थोक में डाटा के उपयोग के करार करलऽ गेलऽ छै । ग्राहकऽ सें प्रतिदिन एक रुपया ही वसूललऽ जैतै । एकरऽ सब्रक्रिप्शन वार्षिक होतै आरू एकमुश्त भुगतान करै ल॑ होतै ।

(Source – http://worldnow.in/bsnl-to-provide-unlimited-internet-data-in-just-rupee-1-64614651441/)

Comments are closed.

error: Content is protected !!