नई दिल्ली : दुनिया केरऽ सबसं॑ बड़ऽ सूचना प्रौद्योगिकी कंपनी आरू सबसं॑ बड़ऽ मोबाइल फोन निर्माता मं॑ सं॑ एक,  एप्पल न॑ आपनऽ मोबाईल फोन आरू उपकरण मं॑ अंगिका भाषा क॑ शामिल करन॑ छै.  एप्पल न॑ बितलऽ बुधवार दिनांक १६ सितंबर २०१५ रात क॑ अंगिका भाषा समर्थित दुनिया केरऽ आधुनिकतम मोबाइल ऑपरेटिंग सिस्टम (ओएस) आईओएस-९ (iOS 9) लाँच करलकै. एकदम आसानी सं॑ उपयोग करलऽ जाय वाला अंतरफलक (Interface), अद्भुत फीचर आरू सुरक्षा सुविधा वाला एप्पल केरऽ नवीनतम ऑपरेटिंग सिस्टम आईओएस-९ एकरऽ आय-फोन (iPhone), आय-पैड (iPad), आय-पौड टच (iPod touch) केरऽ आधार स्तंभ छेकै. इ सुंदर आरू आकर्षक लगला के साथ-साथ खूबसूरती आरू सरलता स॑ काम करै लेली डिजाइन करलऽ गेलऽ छै.

इन्स्क्रिप्ट की-बोर्ड युक्त होला सं॑ आईओएस-९ अंतरफलक पर देवनागरी लिपि मं॑ लिखलऽ जाय वाला भाषा सब अल्प समय मं॑ शुद्धता के साथ लिखलऽ जाब॑ सकै छै. आईओएस-९ सं॑ हिंदी, संस्कृत, अंगिका, अवधी, मगही, मैथिली, नेपाली, संथाली आदि आसानी सं॑ लिखलऽ जाब॑ सकै छै. एकरऽ साथ ही अंगिका भाषा युक्त वेबसाइट आरू ऐप्लीकेशंस क॑ आईओएस-९ केरऽ पूरा समर्थन रहतै.

अभी तलक एप्पल केरऽ अलावे भारत सरकार केरऽ सी-डैक कंपनी ही एकमात्र ऐन्हऽ कंपनी छै जे एंड्रायड पर इन्स्क्रिप्ट की-बोर्ड सं॑ मोबाइल पर देवनागरी लिपि आरू अन्य भारतीय भाषा केरऽ लिपि टाइप करै के सुविधा प्रदान करै छै. गूगल भी इ मामला मं॑ अभी पीछू छै. हाल मं॑ भोपाल मं॑ आयोजित १०वाँ विश्व हिंदी सम्मेलन केरऽ दौरान अंगिका.कॉम केरऽ कुंदन अमिताभ न॑ गूगल केरऽ अधिकारी सं॑ मिली क॑ आग्रह करन॑ छै कि गूगल भी मोबाइल लैंग्वेज इन्पुट टूल मं॑ इन्स्क्रिप्ट की-बोर्ड केरऽ माध्यम सं॑ देवनागरी लिपि आधारित हिंदी, संस्कृत, अंगिका आदि भाषा क॑ टाइप करै के सुविध प्रदान कर॑. गूगल सं॑ इ भी आग्रह करलऽ गेलऽ छै कि अन्य भारतीय भाषा लेली भी इन्स्क्रिप्ट की-बोर्ड केरऽ माध्यम सं॑ मोबाइल पर टाइप करै के सुविधा प्रदान करलऽ जाय. गूगल केरऽ अधिकारी सब न॑ एकरा पर सहमति जतैने रहै. लेकिन मोबाइल उपकरण मं॑ इन्स्क्रिप्ट की-बोर्ड केरऽ सुविधा उपलब्ध कराबै केरऽ इ मामला मं॑ एप्पल, गूगल सं॑ आगू निकली गेलऽ छै. Angika_language_option_in_Apple_1

एप्पल इंक॰ एगऽ अमेरिकी बहुराष्ट्रीय कंपनी छेकै जे उपभोक्ता इलेक्ट्रॉनिक्स आरू कंप्यूटर सॉफ्टवेयर उत्पादऽ के डिजाइन आरू विनिर्माण करै छै. एप्पल मैकिन्टौश, आईपॉड आरू आईफ़ोन जैसनऽ हार्डवेयर उत्पादऽ लेली प्रसिद्ध छै. राजस्व केरऽ मामला मं॑ एप्पल, सैमसंग इलेक्ट्रॉनिक्स केरऽ बाद दुनिया केरऽ दोसरऽ सबसं॑ बड़ऽ सूचना प्रौद्योगिकी कंपनी छेकै. आरू दुनिया केरऽ तेसरऽ सबसं॑ बड़ऽ मोबाइल फोन निर्माता छेकै.

एप्पल कंपनी केरऽ स्थापना 1 अप्रैल 1976 क॑ स्टीव जॉब्स, स्टीव वोजनियक आरू रोनाल्ड वेन द्वारा करलऽ गेलऽ रहै जेकरा 3 जनवरी 1977 क॑ एप्पल कंप्यूटर इंक॰ केरऽ नाम देलऽ गेलै. बाद मं॑ 9 जनवरी 2007 क॑ कंपनी नाम से “कंप्यूटर” शब्द हटाय क॑ एप्पल इंक केरऽ नाम देलऽ गेलै. एप्पल सोलह देशऽ मं॑ 453 रिटेल स्टोर के साथ-साथ ऑनलाइन एप्पल स्टोर और आईट्यून्स स्टोर भी चलाबै छै, जे दुनिया केरऽ सबसं॑ बड़ऽ संगीत बाज़ार छेकै.

Angika_language_option_in_Apple_2

Comments are closed.