भागलपुर । अंगिका भाषा क॑ भारतीय संविधान केरऽ आठमऽ अनुसूची म॑ शामिल कराबै लेली आरू अंग-अंगिका स॑ जुड़लऽ  समुचित सम्मान व अधिकार केरऽ सवाल क॑ ल॑ क॑ अंग उत्थानान्दोलन समिति, बिहार-झारखंड सह अंग मुक्ति मोर्चा केरऽ तत्वावधान म॑ राष्ट्रीय राजधानी क्षेत्र दिल्ली केरऽ ऐतिहासिक जन्तर-मन्तर स्थल पर २२ अगस्त २०१६ ई. स॑ अनशन आरू सत्याग्रह केरऽ शंखनाद करलऽ गेलऽ छै । जेकरऽ तैयारी युद्ध स्तर पर चली रहलऽ छै ।

ज्ञातव्य छै कि भारत केरऽ बिहार, झारखंड आरू पश्चिम बंगाल राज्य म॑ कुल मिलाय क॑ लगभग छह करोड़ स॑ भी जादा लोगऽ     द्वारा अंगिका भाषा प्रयोग म॑ लानलऽ जाय छै । बिहार केरऽ पंद्रह अंगिकाभाषी जिला छेकै- अररिया, कटिहार, पुर्णिया, किसनगंज, मधेपुरा, सहरसा, सुपौल, भागलपुर, बाँका, जमुई, मुंगेर, लखीसराय, बेगूसराय, शेखपुरा, खगड़िया. झारखंड केरऽ सात अंगिकाभाषी जिला छेकै – साहेबगंज, गोड्डा, देवघर, पाकुड़, दुमका, गिरीडीह, जामताड़ा आरू पश्चिम बंगाल केरऽ तीन अंगिकाभाषी जिला छेकै – मालदा, उत्तर दिनाजपुर, आरू बीरभूम । अंगिका भाषा भाषी अन्य स्थान दिल्ली, मुंबई, कलकत्ता सहित भारत केरऽ हर राज्य म॑ ही बड़ऽ तादाद म॑ निवासित छै । ई एगो घोर आश्चर्य केरऽ विषय छेकै कि भारत केरऽ करोड़ों लोगऽ के  भाषा अंगिका क॑ आजादी के एतना बरस बितला के बाद भी भारतीय संविधान केरऽ अष्टम अनुसूची म॑ शामिल नै करलऽ गेलऽ छै ।

अंग उत्थानान्दोलन समिति,बिहार-झारखंड सह अंग मुक्ति मोर्चा केरऽ राष्ट्रीय अध्यक्ष गौतम सुमन न॑ प्रेस विज्ञप्ति जारी करी क॑ बतैन॑ छै कि अनशन आरू सत्याग्रह केरऽ तैयारी युद्ध स्तर पर जारी छै । श्री सुमन केरऽ अनुसार ई सत्याग्रह अनशन मं॑ बिहार – झारखंड सहित सौसे अंग क्षेत्र सं॑ काफी तादाद मं॑ अंगिका भाषी के पहुँचै के अनुमान छै । हुनकऽ अनुसार हुनी फिलहाल दिल्ली मं॑ छै आरू हुनका जौरें समिति केरऽ बाँका जिला अध्यक्ष विपिन सिंह,जमुई जिला अध्यक्ष अरूण सिन्हा,पूर्णियाँ जिला अध्यक्ष संजय केशरी,सहरसा जिला अध्यक्ष मनोज कुमार आरू बेगूसराय जिला अध्यक्ष कैलाश कसेरा भी दिल्ली मं॑ छै । सब मिली क॑ दिल्ली भ्रमण करी क॑ स्थल के चयन करै के साथ-साथ दिल्ली म॑ रही रहलऽ अंगिकाभाषियऽ सहित अंग क्षेत्र केरऽ सांसदऽ सिनी सं॑ भी संपर्क करी रहलऽ छै। ई दौरान हुनी सब आज दिल्ली पुलिस आयुक्त आरू दिल्ली केरऽ मुख्यमंत्री स॑ भी मिली करी क॑ आयोजित हो. वाला अनशन सह सत्याग्रह के सूचना व माँग पत्र सौंपी देलकै ।

gautam_suman_2_august_2016

श्री सुमन केरऽ अनुसार ई बीच आदरणीय राजनाथ सिंह गृह मंत्री,भारत सरकार स॑ अंगिका भाषा केरऽ संबंध मं॑ आगामी ८ अगस्त क॑  वार्ता करै के समय मिललऽ छै । गौतम सुमन न॑ एकरा पर हर्ष जतैतं॑ हुअ॑ आशा व्यक्त करन॑ छै कि ई मुलाकात स॑ सकारात्मक नतीजा सामने ऐतै । श्री सुमन के कहना छै कि एतना त॑ तय छै कि अंग-अंगिका क॑ बिना समुचित सम्मान व अधिकार दिलैल॑ बगैर नै त॑ हम्मं॑ चैन स॑ बैठबै आरू नै त॑ सरकार क॑ ही चैन स॑ बैठ॑ देबै ।

श्री सुमन के कहना छै कि हुनी आजीवन अंग आरू अंगिका लेली संघर्षरत रहतै । श्री सुमन न॑ बहरहाल एकरा लेली आमजन आरू अंग महाजनपद केरऽ जनप्रतिनिधियऽ सिनी के सहयोग व सहभागिता केरऽ आवश्यकता के अपेक्षा करतं॑ हुअ॑ सब स॑ अंग अंगिका केरऽ अस्मिता व अस्तित्व के खातिर खुली क॑ आगू आबै के आग्रह करन॑ छै । दिल्ली मं॑ आयोजित होय रहलऽ सत्याग्रह संबंधी जादा जानकारी  लेली श्री गौतम सुमन, राष्ट्रीय अध्यक्ष, अंग उत्थानान्दोलन समिति,बिहार-झारखंड सह अंग मुक्ति मोर्चा न॑  9934880594,9709432576 पर संपर्क करै के आग्रह करन॑ छै ।

Comments are closed.