मैनहोल कि डेथहोल ?

पिछला २९ अगस्त क॑ मुंबई म॑ होलऽ गरदौआ झरिया न॑ भयंकर तबाही मचैन॑ रहै । जेकरा चलत॑ यहाँकरऽ सड़कऽ प॑ भयंकर जलजमाव होय गेलऽ रहै । सड़क नद्दी म॑ बदली गेलऽ छेलै । ऐन्हे झरिया म॑ बहुत तरह के दुर्घटना के बीच एगो बड़ऽ दुःखद आरू हिरदय विदारक घटना घटी गेलऽ छेलै । जे चेष्टा करला प॑ भी भुलाना मुश्किल होय जाय छै । भारी बारिश के दौरान बम्बई हॉस्पीटल केरऽ एगो नामी डॉक्टर डॉ. दीपक अमरापुरकर सड़क प॑ चलत॑-चलत॑ अचानक लापता होय गेलऽ छेलै ।

लगातार बारिश केरऽ अत्यधिक तीव्रता केरऽ हाई-टाईड स॑ सम्मिलन चलत॑ पूरा मुंबई जेना कि जलमग्न होय गेलऽ छेलै लगभग २६ जुलाई २००५ ऐसनऽ ही । ऐसनऽ म॑ अंदेशा जतैलऽ जाय रहलऽ छेलै कि हुनी कोनो मैनहोल म॑ गिरी गेलऽ होतै । आखिरी बार हुनका अपनऽ२ घऽर स॑ करीब एक किलोमीटर केरऽ दूरी प॑ देखलऽ गेलऽ छेलै । पानी जादा होला के कारण हुनी गाड़ी स॑ उतरी क॑ पैदल घर जाब॑ लगलऽ छेलै । लेकिन हुनी घऽर नै पहुँच॑ पारलऽ छेलै ।

मैनहोल लगाँ हुनकऽ छतरी मिललऽ छेलै । जेकरा चलत॑ ई शक होलै कि हुनी मैनहोल म॑ गिरी गेलऽ होतै । पानी उतरला के साथ-साथ सुरक्षा एजेंसी सब जब॑ हुनकऽ तलाश कर॑ लागलै त॑ शव वर्ली केरऽ नाला के पास मिललै । डॉ. अमरापुरकर मुंबई ही नै बल्कि देश केरऽ शीर्ष लीवर डॉक्टर सब म॑ स॑ एक रहै । हुनकऽ कुशलता, प्रतिभाशाली व्यक्तित्व आरू चिकित्सकिय अनुभव लेली मेडिकल जगत म॑ हर कोय हुनका सम्मान दै छेलै ।

सीवर केरऽ सफाई लेली मैनहोल म॑ घुसला प॑ सफाईकर्मी सब के मौत त॑ बहुत आम छै । ई आजकल बहुत कॉमन होय गेलऽ छै । शहर चाहे कोय भी रह॑ । ई त॑ ई लेली होय छै कि पंप-मशीन के जगह प॑ सफाईकर्मी क॑ सीवर म॑ घपसै ल॑ मजबूर करलऽ जाय छै आरू अंदर म॑ जहरीला गैस स॑ दम घुटी क॑ लोगऽ के मौत होय जाय छै ।

लेकिन बारिश के दौरान केकरो मैनहोल म॑ गिरी क॑ मौत होय जाय ई अपने-आप म॑ सोचनीय विषय छै । बारिश केरऽ मौसम के बिना भी कभी-कभी मैनहोल म॑ गिरी क॑ लोगऽ सिनी के मौत के खबर सुनै ल॑ मिलै छै ।

फरीदाबाद नगर निगम केरऽ लापरवाही स॑ दू जून २०१७ शुक्रवार क॑ खुललऽ मैनहोल म॑ गिरला स॑ एगो महिला सहित दू लोगऽ के मौत होय गेलै । बतैलऽ जाय रहलऽ छै कि महिला रास्ता म॑ फोन प॑ बात करतें-करतें आगू बढ़ी रहलऽ छेलै । अचानक ओकरऽ संतुलन बिगड़लै आरू वू मैनहोल म॑ गिरी परलै । ओकरा बचाबै के कोशिश म॑ एगो अन्य शख्स के भी मौत होय गेलै । पल्ला पुल के पास बनलऽ मैनहोल करीब तीस फुट गहरा छै । स्थानीय लोगऽ के हिसाब स॑ दुर्घटना ॑ दू साल पहिनै स॑ ई ऐसने खुललऽ पड़लऽ छेलै । बहुत बार नगर निगम स॑ शिकायत करलऽ गेलै लेकिन कोय सुनवाई नै होलै ।

लेकिन जहाँ तक मुंबई केरऽ सवाल छै, वहाँ त॑ मेनहोल कोनो स्थानीय लोगे ही खोली देन॑ छेलै कैन्हेंकि रस्ता प॑ जमलऽ पानी आस्तें-आस्तें पास म॑ बनलऽ घऽर सब म॑ घुस॑ लगलऽ छेलै । शुरू म॑ जब॑ हादसा केरऽ जिम्मेवारी बीएमसी पर डाललऽ जाय रहलऽ छेलै त॑ तर्क देलऽ गेलै कि एतना बारिश म॑ ओकरा लगाँ ई बात के सूचना ही नै छेलै कि मैनहोल खुललऽ पड़लऽ छै ।

जाहिर छै कि बीएमसी जैसनऽ देश केरऽ सबस॑ बड़ऽ संस्था के पास जब ई तरह के कोय मैकेनिज्म नै छै कि खुललऽ मैनहोल के ओकरा तुरंत जानकारी मिल॑ सक॑ त॑ दोसरऽ शहर केरऽ म्यूनिसिपल कॉरपोरेशन के त॑ बात करना भी बेकार छै ।

कहलऽ जाय छै – जहाँ चाह, वहाँ राह । जब॑ मंगलयान क॑ शुद्धता के साथ मंगल केरऽ वायुमंडल म॑ भेजलऽ जाब॑ सकै छै त॑ ई त॑ धरती पर के मानव निर्मित मेनहोल ही छेकै । यहाँ भी जब जीपीएस स॑ गतिमान गाड़ी सब क॑ जब॑ शुद्धता के साथ टोहलऽ जाब॑ सकै छै त॑ जानलेवा मैनहोल क॑ कैन्हें नै ?

फिलहाल डॉ. दीपक अमरापुरकर केरऽ मौत प॑ जाँच लेली बनलऽ जाँच समिति न॑ प्रस्ताव देन॑ छै कि हर मैनहोल केरऽ ५-६ ईंच नीचें जाली लगैलऽ जाय । जेकरा स॑ बारिश म॑ या खुललऽ मैनहोल म॑ कोय गिरियो जाय त॑ अंदर जाय स॑ बच॑ सक॑ ।

हुन्न॑ बीएमसी केरऽ एगो इंजीनियर न॑ सुझाव देल॑ छै कि हर मैनहोल प॑ आरएफआईडी टैग लगैलऽ जाय । जेकरा स॑ ढक्कन क॑ जों कोय अपनऽ जग्घऽ स॑ हटाबै छै त॑ ओकरऽ सूचना तुरंत मिल॑ सक॑ ।

मुख्य सवाल त॑ ई छै कि कोनो दुर्घटना के बाद ही कैन्हें बड़ऽ-बड़ऽ बात क॑ अमली जामा पहनाबै के बात करलऽ जाब॑ लगै छै । बड़ऽ-बड़ऽ बात के जगह प॑ दुर्घटना के पहिनै जों यथार्थ म॑ ऐन्हऽ तब्दीली लानै के प्रक्रिया शुरू हुअ॑ त॑ जादे अच्छा ।

आखिर केकरऽ सुरक्षा ?

आम जन-जीवन स॑ संबंधित जब॑ कोय बड़ऽ दुर्घटना घटै छै त॑ प्रायः ई पैलऽ जाय छै कि वहाँ जेतना सुरक्षा प्रबंध होना चाहियऽ ओतना नै छै  ।  लगभग हर बार ई देखै ल॑ मिलै छै कि जेतना संख्या म॑ सुरक्षा बल केरऽ तैनाती होना चाहियऽ वास्तव म॑ ओतना होय नै छै । एकरऽ कारण तुरंत समझ म॑ नै आबै छै । ई पक्ष के अवलोकन नै हुअ॑ पारै छै कि जों पर्याप्त संख्या म॑ पुलिस तैनाती रहतियै त॑ दुर्घटना क॑ टाललऽ जाब॑ सकै रह॑ ।

अभी हाल म॑ जारी एगो सर्वेक्षण केरऽ आँकड़ा एकरा प॑ कुछ रौशनी डालै छै । गृह मंत्रालय केरऽ ब्यूरो ऑफ पुलिस रिसर्च ऐंड डिवेलपमेंट न॑ देश म॑ पुलिसिंग केरऽ जे हाल बयान करन॑ छै, वू हैरत करै वाला छै ।  ताजा आंकड़ा के मुताबिक देश म॑ ६६३ लोगऽ पीछू खाली एगो पुलिसकर्मी तैनात छै । जबकि हर वीआईपी केरऽ सेवा म॑ औसतन तीन पुलिसकर्मी  ड्यूटी प॑ तैनात रहै छै ।

अखबार म॑ छपलऽ खबर के आधार प॑ अपनऽ देश म॑ अखनी कुल १९ लाख २६ हजार पुलिसकर्मी छै । जेकरा म॑ ५६९४४ पुलिसकर्मी देश म॑ मौजूद २०८२८  वीआईपी लोगऽ के सुरक्षा लेली तैनात छै ।

देश केरऽ सबस॑ अशिक्षित आरू गरीब मानलऽ जाय वाला राज्य बिहार म॑ देश केरऽ सबस॑ जादे वीआईपी मौजूद छै । ई लेली ई मामला म॑ सबस॑ खराब हालत बिहार के ही छै । जहां सबस॑ जादा ३२०० वीआईपी छै आरू जेकरऽ  सुरक्षा म॑ ६२४८ पुलिसकर्मी तैनात छै । ओकरऽ बाद पश्चिम बंगाल के नंबर आबै छै, जहाँ २२०७  वीआईपी केरऽ सुरक्षा म॑ ४२३३  पुलिसकर्मी लगलऽ छै । तेसरऽ जग्घऽ प॑ जम्मू आरू कश्मीर छै जेकरऽ २०७५ वीआईपी के सुरक्षा म॑ ४४९९ पुलिसकर्मी लगलऽ छै । वहीं यूपी म॑ १९०१ वीआईपी केरऽ सुरक्षा लेली४६८१ पुलिसकर्मी, पंजाब म॑ १८५२ वीआईपी के सुरक्षा म॑ ५३१५ पुलिसवाला लगलऽ छै । लक्षद्वीप देश केरऽ एकमात्र एसनऽ राज्य छै जहाँ पुलिस व्यवस्था प॑ वीआईपी कल्चर केरऽ बोझ नै पड़लऽ हुअ॑ ।

देश केरऽ राजधानी दिल्ली केरऽ हालत त॑ आरू अजूबा स॑ भरलऽ छै । देश भरी म॑ सबस॑ कम वीआईपी प॑ सबस॑ जादे पुलिस केरऽ तैनाती दिल्ली म॑ देखै ल॑ मिलै छै ।  दिल्ली म॑ मात्र ४८९ वीआईपी केरऽ सुरक्षा म॑ ७४२०  पुलिसकर्मी तैनात छै ।  देश केरऽ आर्थिक राजधानी मुंबई म॑  खाली ७४ वीआईपी छै जेकरा ९६१ पुलिसकर्मी सुरक्षा प्रदान करी रहलऽ छै । केरल म॑ भी खाली ५४ वीआईपी छै जेकरा २१४ पुलिसकर्मी सुरक्षा द॑ रहलऽ छै।

सौसे दुनिया केरऽ बात करलऽ जाय त॑ ब्रिटेन म॑ कुल ८४, फ्रांस म॑ १०९, जापान म॑ १२५, ऑस्ट्रेलिया म॑ २०५ , अमेरिका म॑ २५२ , साउथ कोरिया म॑ २८२, रूस म॑ ३१२ आरू चीन म॑ ४३५ वीआईपी छै । मोटा-मोटी ई अंदाजा लगैलऽ जाब॑ सकै छै कि जों पूरा  दुनिया केरऽ वीआईपी क॑ जोड़ी क॑ देखलऽ जाय त॑ पता चलतै कि ओकरऽ संख्या भारत केरऽ वीआईपी स॑ कम ही छै ।

हाल म॑  केंद्रीय गृह मंत्रालय द्वारा बतैलऽ गेलऽ छेलै कि देश केरऽ सब्भे राज्यऽ म॑ कुल मिलाय क॑ पुलिसकर्मियऽ के कुल स्वीकृत पदऽ के संख्या २२६३२२२ छै, जेकरा म॑ स॑ लगभग सवा तीन लाख पद खाली छै । लोगऽ के जरूरत के हिसाब स॑ त॑ पुलिस कम छेबे करै । जे छै ओकरौ म॑ दस फीसदी स॑ जादा  देश केरऽ वीआईपी आरू ताकतवर लोगऽ के आगू-पीछू घूमत॑ रहै छै ।

भारत ऐन्हऽ दुनिया केरऽ सबस॑ बड़ऽ लोकतांत्रिक देश म॑ कि सचमुच म॑ पुलिसकर्मी केरऽ एतनऽ बड़ऽ फौज वीआईपी के पीछू लगाय क॑ रखना जरूरी छै ?