सुधार केरऽ राह प॑ जेलऽ के धरान !

अबरी दाफी (अंगिका कॉलम) / कुंदन अमिताभ

जेल म॑ जाय वाला इंसान ही होय छै । कोनो जुर्म के चलत॑ कोय जेल चल्लऽ गेलऽ छै एकरऽ मतलब ई नै छै कि वू भर जिनगी अपराधी बनी क॑ ही जिंदा रहतै । एगो गलत धारणा अपनऽ समाज म॑ छै कि जे एक बार जेल चल्लऽ जाय छै वू समाज लेली अछूत बनी जाय छै । लोगें समझै छै कि जेल जाय वाला अच्छा इंसान नै छै । ई लेली सजा काटी क॑ जेल स॑ निकलै वाला के प्रति भी समाज केरऽ नजरिया म॑ बदलाव नै देखै ल॑ मिलै छै ।

स्थिति यहाँ तलक बदतर होय जाय छै कि जेल गेलऽ इंसान केरऽ आम इंसान ऐसनऽ समाजिक अस्वीकृति के चलत॑ जेल स॑ निकलला के बाद भी वू अपराध केरऽ दुनिया म॑ बार-बार डेग बढ़ाबै ल॑ बेवस होय जाय छै । जेल केरऽ अंदर त॑ ओकरा सथ॑ इंसान ऐसनऽ बरताव भी बहुत मुश्किल स॑ होय छै । जेल केरऽ अंदर आरू जेल स॑ बाहर ऐला के बाद  अपने सब केरऽ बीच रही रहलऽ एगो इंसान केरऽ ऐन्हऽ दयनीय सामाजिक स्थिति क॑ देखी क॑  बहुत समय स॑ ई महसूस करलऽ जाय रहलऽ छेलै कि कैदी केरऽ दशा म॑ सुधार लेली जेल सुधार दन्न॑ ध्यान देलऽ जाय ।  जेल सुधार स॑ ई लेली मुँह नै मोड़लऽ जाब॑ सकै छै कि एकरा म॑ समाज केरऽ गुनहगार सब रहै छै । एक सभ्य समाज म॑ जेलऽ के उद्देश्य अपराधी सब क॑  सुधारी क॑ एगो बेहतर इंसान बनाना होय छै । जेकरा स॑ जेल त॑ जेल, जेल स॑ बाहर ऐला के बाद ओकरा एगो स्वाभाविक इंसान ऐन्हऽ जिंदगी समाज म॑ जियै के मौका मिल॑ ।

ई एकदम जरूरी होय गेलऽ छै कि सरकार व प्रशासन जेल क॑ सुधारै लेली ठोस कदम उठाब॑ ।  संयोग स॑ हाल म॑ ही सर्वोच्च न्यायालय न॑ जेलऽ म॑ सुधार लेली एगो निर्देश जारी करल॑ छै । सुप्रीम कोर्ट न॑ सब्भे हाई कोर्ट स॑ कहल॑ छै कि पहलऽ बार अपराध करै वाला कैदियऽ लेली काउंसलर नियुक्त करलऽ जाय । साथ ही तमाम कैदियऽ क॑ उचित मेडिकल सुविधा मुहैया करैलऽ जाय । ऐसनऽ कोनो सुविधाजनक व्यवस्था हुअ॑ कि वू अपनऽ परिजन आरू वकील स॑ आसानी स॑ बात कर॑ सक॑ ।  सब्भे राज्य  द्वारा ओपन जेल सिस्टम शुरू करै पर भी विचार करलऽ गेलै । राज्य सरकारऽ स॑ कहलऽ गेलऽ छै कि वू राज्य लीगल सर्विस अथॉरिटी के साथ मिली क॑ जेलऽ के तमाम सीनियर पुलिस ऑफिसर लेली ट्रेनिंग केरऽ आयोजन कर॑ आरू बताब॑ कि जेल म॑ बंद कैदी सब  के प्रति ओकरऽ कैन्हऽ  जिम्मेदारी बनै छै  । साथ॑ ओकरा ई भी बतैलऽ जाय कि कैदी सब  के अधिकार की छै ।

बर्ष २०१३ ई. म॑ सुप्रीम कोर्ट म॑ एगो पीआईएल दाखिल करी क॑  कहलऽ गेलऽ छेलै कि देश भर केरऽ १३८२ जेलऽ म॑ बंद कैदियऽ के स्थिति अमानवीय होय गेलऽ छै । ई लेली जेल सुधार वास्त॑ निर्देश जारी करै के जरूरत बतलैलऽ गेलऽ छेलै । जेल सुधार के प्रति सरकार व प्रशासन के रवैया बेहद ढीला-ढाला रहलऽ छै । आजादी के बाद जेल सुधार लेली अनेक  समिति बनलै। जेना कि वर्ष १९८३ म॑ मुल्ला समिति, १९८६ म॑ कपूर समिति आरू १९८७ म॑ अय्यर समिति आदि । पर सब्भे समिति केरऽ सुझावऽ क॑ कोय महत्व नै देलऽ गेलै । यह॑ वजह छै कि आय जेलऽ के हालत बद स॑ बदतर होलऽ जाय रहलऽ छै । आरू जेलऽ म॑ कैदी नारकीय जीवन जीयै ल॑ मजबूर होय रहलऽ छै । जेल केरऽ  बदइंतजामी सब हद पार करी चुकलऽ छै ।

जेलऽ सब म॑ जेल केरऽ क्षमता स॑ जादे कैदी रखलऽ जाय रहलऽ छै । कमोबेश देश केरऽ हर जेलऽ के यह॑ हालत छै । कोर्ट म॑ लंबित पड़लऽ मुकदमा के चलत॑ जेलऽ म॑ विचाराधीन कैदी सब के संख्या बढ़त॑ जाय रहलऽ छै । राष्ट्रीय अपराध रिकॉर्ड ब्यूरो केरऽ मुताबिक जेलऽ म॑ बंद ६७.६० फीसदी लोगऽ के मामला अदालतऽ म॑ विचाराधीन छै । एकरा म॑ स॑ जादातर ऐसनऽ छै जेकरा प॑ बहुत मामूली आरोप छै । गरीबी के वजह स॑ वें जमानत तलक नै लिअ॑ पारी रहलऽ छै । कुछ ऐसनऽ करलऽ जाना चाहियऽ कि ऐन्हऽ कैदी केरऽ केसऽ के निबटारा फास्ट ट्रैक प॑ हुअ॑ । जजऽ के खाली पद क॑ भरना भी ओतने जरूरी छै जेकरा स॑ कि मुकदमा केरऽ जल्दी निपटारा म॑ तेजी लानलऽ जाब॑ सकै छै।

एकरा म॑ कोय शक नै छै कि सर्वोच्च न्यायालय द्वारा जेलऽ म॑ सुधार लेली जारी करलऽ गेलऽ निर्देश क॑ तत्काल अमल म॑ लानलऽ जाय त॑ समाज म॑ एगो बहुत बड़ऽ बदलाव नजर ऐतै ।