निर्वाचन आयोग द्वारा सजा दै केरऽ अधिकार के माँग के अहमयित

अबरी दाफी (अंगिका कॉलम) / कुंदन अमिताभ

निर्वाचन आयोग न॑ हाल म॑  चुनाव सुधार केरऽ दिशा मं॑ मौजूदा जनप्रतिनिधित्व कानून म॑ बदलाव लेली जरूरी कदम उठाबै के वकालत करन॑ छै । आयोग न॑ कानून मंत्रालय स॑ जल्दी स॑ कदम उठाबै के माँग करतं॑ हुअ॑ कहल॑ छै कि अधिकार मिलला के बाद वू बहुत तरह के गड़बड़ी आरू भ्रष्ट गतिविधि सब पर ठोस कार्रवाई कर सकै मं॑ सक्षम होय जैतै ।

निर्वाचन आयोग के पास ई उत्तरदायित्व होय छै कि वू निर्वाचनॉ के पर्यवेक्षण, निर्देशन व आयोजन करवाब॑ । वू राष्ट्रपति उपराष्ट्रपति, संसद, राज्यविधानसभा के चुनाव करबाबै छै । निर्वाचक नामावली तैयार करना, राजनैतिक दलऽ के पंजीकरण करना, राजनैतिक दलऽ क॑ राष्ट्रीय, राज्य स्तर के दलऽ के रूप में वर्गीकरण, मान्यता देना, दलीय-निर्दलीय क॑ चुनाव चिन्ह देना, सांसद/विधायक के अयोग्यता (दल बदल छोड़ी क॑) पर राष्ट्रपति/राज्यपाल क॑ सलाह देना, गलत निर्वाचन उपाय के उपयोग करै वाला व्यक्ति क॑ निर्वाचन लेली अयोग्य घोषित करना भी निर्वाचन आयोग के उत्तरदायित्व होय छै ।

आयोग के ई मानना छै कि कमजोर कानून के चलतें ओकरा लगाँ  कोय कानूनी प्रावधान व अधिकार नै छै जेकरा स॑ कि आचार संहिता मामला तक मं॑ भी कोनो कार्रवाई करलऽ जाब॑ सकै छै । आयोग केरऽ ई तर्क छै कि अखनी ओकरा लगाँ  आचार संहिता केरऽ उल्लघंन करै वाला के खिलाफ कोनो कार्रवाई करै के अधिकार नै छै । बेसी स॑ बेसी वू  उल्लघंन करै वाला के निंदा कर॑ सकै छै या फेरू चेतावनी जारी कर॑ सकै छै । आयोग तरफऽ स॑ देलऽ जाय रहलऽ दलील प्रत्यक्ष व परोक्ष रूप स॑ हर चुनाव मं॑ आम मतदाता के भी दलील रहै छै । आम भारतीय मतदाता शिद्दत स॑ ई महसूस करतें ऐलऽ छै कि आयोग के हाथ मंट कोनो पावर नै छै । खाली गीदड़-भभकी देना समस्या केरऽ सही समाधान नै छै ।

निर्वाचन आयोग चाहै छै कि ऐन चुनाव के पहल॑ पार्टी सब तरफऽ स॑ होय वाला मनलुभावन घोषणा  क॑ रोकलऽ जाय । सुप्रीम कोर्ट केरऽ फैसला के बाद आयोग न॑ ई बारे म॑ लॉ मिनिस्ट्री क॑ प्रस्ताव भी भेजलऽ गेलऽ छै । जेकरऽ तहत आयोग न॑ प्रस्ताव देल॑ छै कि चुनावी घोषणा पत्र क॑ आदर्श आचार संहिता केरऽ दायरा मं॑ लानलऽ जाय । प्रस्ताव मं॑ ई भी कहलऽ गेलऽ छै कि चुनाव सें छो महीना पहल॑ कोय भी सरकार नया योजना केरऽ ऐलान नै कर॑ सकै छै । चुनाव आयोग ई भी चाहै छै कि घोषणा पत्र म॑ मुफ्त चीजऽ के जरिया मतदाता क॑ प्रभावित करै वाला प॑ भी कार्रवाई करै के अधिकार ओकरा मिल॑ ।

सरकार स॑ कड़ा कानून बनाबै के वकालत करतं॑ हुअ॑ चुनाव आयोग न॑ कहल॑ छै कि हेट-स्पीच आरू भड़काऊ विज्ञापन प॑ रोक लगाय लेली ई बेहद जरूरी छै । चुनाव आयोग के कहना छै कि गैर जमानती धारा में कार्रवाई लेली कानून बनैलऽ जाय ।

प्रस्ताव में ई भी कहलऽ गेलऽ छै कि चुनाव लड़ै वाला उम्मीदवार तरफऽ स॑ जमा करैलऽ जाय वाला जमानत राशि केरऽ मूल्य भी बढ़ैलऽ जाय । आयोग के मानना छै कि ई प्रस्ताव स॑ चुनाव मं॑ गंभीर व निष्ठावान उम्मीदवार ही खड़ा हुअ॑ सकतै व लापरवाह, डमी व बोटकटवा उम्मीदवार प॑ लगाम लगतै ।

हलाँकि ई बात मं॑ कोय शक नै छै कि ई कदम स॑ सौसे चुनाव प्रक्रिया मं॑ सख्ती बरतै मं॑ चुनाव आयोग क॑ मदद मिलतै  ।  आपनऽ जिम्मेवारी क॑ निभाबै मं॑ निर्वाचन आयोग के दोसरा के उपर निर्रभरता भी खतम होतै । साथ ही भारत मं॑ निर्वाचन सुधार क॑ एगो नया दिशा मिलतै ।