क्रिकेट म॑ भारत के लंका विजय एगो अभूतपूर्व उपलब्धि

अबरी दाफी (अंगिका कॉलम) / कुंदन अमिताभ

श्रीलंका म॑  टेस्ट,वनडे आरू टी-२० केरऽ नौ लगातार मैच म॑ जीत दर्ज करी क॑ आरू विदेशी जमीन प॑ तीनो फॉरमेट केरऽ क्रिकेट सीरीज जीती क॑ अभूतपूर्व उपलब्धि हासिल करै वाला  भारतीय टीम केरऽ फौलादी  मारक शक्ति केरऽ लोहा सौसे दुनिया मानी रहलऽ छै ।  भारतीय टीम एगो ऐसनऽ टीम छेकै, जैसनऽ दुनिया केरऽ हर टीम बनै ल॑ चाहै छै । ई टीम मं॑ जबरदस्त काबिलियत छै ।

श्रीलंकाई कोच के कहना छै कि भारतीय टीम स॑ खेल केरऽ तौर-तरीका केरऽ सीख लेना चाहियऽ । सचमुच म॑ चैंपियन ट्राफी केरऽ फाइनल मं॑ पाकिस्तान स॑ करारा हार के बाद  बाद भारतीय टीम म॑ एगो अलग तरह के बदलाव लानल॑ छै।  भारतीय टीम पहल॑ भी काफी काबिल छेलै । खिलाड़ी सब केरऽ प्रदर्शन मं॑ पहल॑ स॑ अखनी जादे स्थिरता आरू सुसंगतता लौकै छै ।

विराट कोहली केरऽ एगो बल्लेबाज आरू कप्तान केरऽ तौर प॑ कद आरू बड़ऽ होय गेलऽ छै । वहीं धोनी न॑ धमाल मचाय क॑ आपनऽ कैरियर के प्रति तरह-तरह के लगैलऽ जाय रहलऽ कयास क॑ धता बताय देलकै । धोनी न॑ नाजुक मौका प॑ बहुत बार टीम क॑ सँभाललकै आरू हार केरऽ दरवाजा स जीत दन्न॑ ल॑ गेलै । धोनी कभी भी कम स॑ संतोष करै वाला मं॑ स॑ नै छेकै । अपनऽ प्रदर्शन स॑ वें जताय देलकै कि विश्वकप-२०१९ मं॑ खेलै खातिर वू केतना बेताब छै ।

श्रीलंका क॑ ओकरे धरती प॑ बेरहमी स॑ नौ मैचऽ मं॑  हराय क॑ अपनऽ तरह के विश्व रेकॉर्ड बनाय के करिश्मा देखाबै वाला भारतीय टीम के जीत के बारे थोड़ा देर लेली ई कहलऽ जाब॑ सकै छै कि विपक्षी टीम बहुत कमजोर छेलै । मलिंगा आरू मैथ्यूज क॑ छोड़ी क॑ सब खिलाड़ी नया छै । लेकिन देखै वाला बात ई छै कि श्रीलंकाई टीम म॑ मलिंगा कोनो खास सफल नै रहलै । कुछ मौका छोड़ी क॑ मैथ्यूज भी सफल नै रहलै । नया खिलाड़ी सब केरऽ प्रदर्शन जादा अच्छा छेलै । अब॑ धनंजय केरऽ बेमिसाल बॉलिंग क॑ केना भुललऽ जाय । अगर टेस्ट मैच क॑ छोड़ी देलऽ जाय त॑ वन-डे आरू टी-२० म॑ श्रीलंका द्वारा बनैलऽ गेलऽ स्कोर, बहुत बड़ऽ  नै सही एगो सम्मानजनक स्कोर त॑ जरूर ही छेलै । जाहिर छै श्रीलंकाई टीम सामान्य प्रदर्शन करलकै, जबकि भारतीय टीम केरऽ प्रदर्शन हर तरह स॑ उम्दा रहलै । भारतीय टीम केरऽ ई गौरवपूर्ण उपलब्धि छेकै, एकरा म॑ कोय शक नै ।

धोनी केरऽ परंपरा क॑ बढ़ैत॑ हुअ॑ कोहली न॑ अपनऽ टीम क॑ खाली सुसंगतता ही नै बल्कि आत्मविश्वास भी देन॑ छै । भारतीय टीम अब॑ खाली आरू खाली जीत केरऽ लक्ष्य क॑ ल॑ क॑ ही मैदान म॑ उतरै छै । जे कि कोय भी चैंपियन टीम केरऽ बहुत बड़ऽ खूबी होय छै । लेकिन साथ ही ई कोनो चैंपियन टीम केरऽ पहचान नै छेकै कि बिना बिकेट केरऽ सौ रन स॑ भी जादा आरू ओकरऽ बाद धराधर एक-दू ओवर मं॑ १०-२० रन जोडी क॑ ५ विकेट गिरी जाय आरू पारी लड़खड़ाब॑ लग॑ । धोनी केरऽ छत्रछाया म॑ परिपक्व होय क॑ कोहली केरऽ निखरलऽ जाय रहलऽ कप्तानी के कोय जोड़ नै छै । कोहली जब कहै छै कि ओकरा खाली एगो मजबूत टीम ही नै चाहियऽ बल्कि सथ॑-सथ॑ एगो ऐसनऽ मजबूत कॉंबिनेशन होना चाहियऽ कि विरोधी पक्ष हतप्रभ रही जाय ।

मतलब साफ छै कि ओपनिंग बल्लेबाज स॑ ल॑ क॑ फिनिशर आरू बॉलर तक हर स्तर प॑ अपना लगाँ ऐसनऽ वैकल्पिक खिलाड़ी होना चाहियऽ जे सुसंगत, स्थिर, भरोसा वाला त॑ हुअ॑ ही, अपनऽ दम प॑ मैच क॑ मझधार स॑ निकालै के दम रखत॑ हुअ॑ ।