आखिर केकरऽ सुरक्षा ?

आम जन-जीवन स॑ संबंधित जब॑ कोय बड़ऽ दुर्घटना घटै छै त॑ प्रायः ई पैलऽ जाय छै कि वहाँ जेतना सुरक्षा प्रबंध होना चाहियऽ ओतना नै छै  ।  लगभग हर बार ई देखै ल॑ मिलै छै कि जेतना संख्या म॑ सुरक्षा बल केरऽ तैनाती होना चाहियऽ वास्तव म॑ ओतना होय नै छै । एकरऽ कारण तुरंत समझ म॑ नै आबै छै । ई पक्ष के अवलोकन नै हुअ॑ पारै छै कि जों पर्याप्त संख्या म॑ पुलिस तैनाती रहतियै त॑ दुर्घटना क॑ टाललऽ जाब॑ सकै रह॑ ।

अभी हाल म॑ जारी एगो सर्वेक्षण केरऽ आँकड़ा एकरा प॑ कुछ रौशनी डालै छै । गृह मंत्रालय केरऽ ब्यूरो ऑफ पुलिस रिसर्च ऐंड डिवेलपमेंट न॑ देश म॑ पुलिसिंग केरऽ जे हाल बयान करन॑ छै, वू हैरत करै वाला छै ।  ताजा आंकड़ा के मुताबिक देश म॑ ६६३ लोगऽ पीछू खाली एगो पुलिसकर्मी तैनात छै । जबकि हर वीआईपी केरऽ सेवा म॑ औसतन तीन पुलिसकर्मी  ड्यूटी प॑ तैनात रहै छै ।

अखबार म॑ छपलऽ खबर के आधार प॑ अपनऽ देश म॑ अखनी कुल १९ लाख २६ हजार पुलिसकर्मी छै । जेकरा म॑ ५६९४४ पुलिसकर्मी देश म॑ मौजूद २०८२८  वीआईपी लोगऽ के सुरक्षा लेली तैनात छै ।

देश केरऽ सबस॑ अशिक्षित आरू गरीब मानलऽ जाय वाला राज्य बिहार म॑ देश केरऽ सबस॑ जादे वीआईपी मौजूद छै । ई लेली ई मामला म॑ सबस॑ खराब हालत बिहार के ही छै । जहां सबस॑ जादा ३२०० वीआईपी छै आरू जेकरऽ  सुरक्षा म॑ ६२४८ पुलिसकर्मी तैनात छै । ओकरऽ बाद पश्चिम बंगाल के नंबर आबै छै, जहाँ २२०७  वीआईपी केरऽ सुरक्षा म॑ ४२३३  पुलिसकर्मी लगलऽ छै । तेसरऽ जग्घऽ प॑ जम्मू आरू कश्मीर छै जेकरऽ २०७५ वीआईपी के सुरक्षा म॑ ४४९९ पुलिसकर्मी लगलऽ छै । वहीं यूपी म॑ १९०१ वीआईपी केरऽ सुरक्षा लेली४६८१ पुलिसकर्मी, पंजाब म॑ १८५२ वीआईपी के सुरक्षा म॑ ५३१५ पुलिसवाला लगलऽ छै । लक्षद्वीप देश केरऽ एकमात्र एसनऽ राज्य छै जहाँ पुलिस व्यवस्था प॑ वीआईपी कल्चर केरऽ बोझ नै पड़लऽ हुअ॑ ।

देश केरऽ राजधानी दिल्ली केरऽ हालत त॑ आरू अजूबा स॑ भरलऽ छै । देश भरी म॑ सबस॑ कम वीआईपी प॑ सबस॑ जादे पुलिस केरऽ तैनाती दिल्ली म॑ देखै ल॑ मिलै छै ।  दिल्ली म॑ मात्र ४८९ वीआईपी केरऽ सुरक्षा म॑ ७४२०  पुलिसकर्मी तैनात छै ।  देश केरऽ आर्थिक राजधानी मुंबई म॑  खाली ७४ वीआईपी छै जेकरा ९६१ पुलिसकर्मी सुरक्षा प्रदान करी रहलऽ छै । केरल म॑ भी खाली ५४ वीआईपी छै जेकरा २१४ पुलिसकर्मी सुरक्षा द॑ रहलऽ छै।

सौसे दुनिया केरऽ बात करलऽ जाय त॑ ब्रिटेन म॑ कुल ८४, फ्रांस म॑ १०९, जापान म॑ १२५, ऑस्ट्रेलिया म॑ २०५ , अमेरिका म॑ २५२ , साउथ कोरिया म॑ २८२, रूस म॑ ३१२ आरू चीन म॑ ४३५ वीआईपी छै । मोटा-मोटी ई अंदाजा लगैलऽ जाब॑ सकै छै कि जों पूरा  दुनिया केरऽ वीआईपी क॑ जोड़ी क॑ देखलऽ जाय त॑ पता चलतै कि ओकरऽ संख्या भारत केरऽ वीआईपी स॑ कम ही छै ।

हाल म॑  केंद्रीय गृह मंत्रालय द्वारा बतैलऽ गेलऽ छेलै कि देश केरऽ सब्भे राज्यऽ म॑ कुल मिलाय क॑ पुलिसकर्मियऽ के कुल स्वीकृत पदऽ के संख्या २२६३२२२ छै, जेकरा म॑ स॑ लगभग सवा तीन लाख पद खाली छै । लोगऽ के जरूरत के हिसाब स॑ त॑ पुलिस कम छेबे करै । जे छै ओकरौ म॑ दस फीसदी स॑ जादा  देश केरऽ वीआईपी आरू ताकतवर लोगऽ के आगू-पीछू घूमत॑ रहै छै ।

भारत ऐन्हऽ दुनिया केरऽ सबस॑ बड़ऽ लोकतांत्रिक देश म॑ कि सचमुच म॑ पुलिसकर्मी केरऽ एतनऽ बड़ऽ फौज वीआईपी के पीछू लगाय क॑ रखना जरूरी छै ?

अचानक स॑ वू दिन सरंग प॑

कल भोर क॑ ऑफिस केरऽ काम स॑ एकाएक मुंबई स॑ दिल्ली जाय के प्रोग्राम बनी गेलै । परसू रात क॑ ऑफिस म॑ बैठलऽ-२ ही मुंबई स॑ दिल्ली जाबै के आरू वापसी केरऽ फ्लाईट केरऽ टिकट बुक करी लेलऽ गेलै । ऑफिस स॑ निकलत॑-निकलत॑ रात केरऽ लगभग साढ़े आठ बजी गेलऽ छेलै । ऑफिस अपार्टमेंट स॑ बाहर निकलला प॑ अहसास होलै कि झमाझम झरिया केतना भयंकर रूप धारण करी लेल॑ छै । हवा केरऽ रफ्तार एतना कि गोर केरऽ जमीन प॑ टिकलऽ रहना मुश्किल लगी रहलऽ छेलै । पूरा के पूरा उधियाय द॑ रहलऽ छेलै । टिकट कटाबै घड़ियाँ कोय अंदाजा नै छेलै कि सितंबर केरऽ अंत म॑ झरिया एतना रौद्र रूप धारण करतै ।

२६ जुलाई २००५ ई. आरू २९ अगस्त २०१७ ई. के बाद कल २० अगस्त २०१७ ई. क॑ मुंबई म॑ एकबार फिर भारी बारिश न॑ दस्तक देन॑ छेलै । मौसम विभाग न॑ अगला ४८ घंटा तलक भारी बारिश के चेतावनी जारी करी देलकै । भोरे-भोर ६ बजे फ्लाईट छेलै, ई लेली ५ बजे तलक एयरपोर्ट पहुँची जाना छेलै । हमरऽ नींद भोरे तीन बजे ही टुटी गेलै । झरिया जारी छेलै । शक हुअ॑ लगलै कि कहीं फ्लाईट कैंसिल नै होय जाय । शक के चलत॑ ताजा खबर लेली इंटरनेट खोललियै । पता चललै मुख्य रनवे बंद करी देलऽ गेलऽ छै । हमरा सथ॑ हमरऽ एगो सहकर्मी भी जाय रहलऽ छेलै । हुनका फोन करी क॑ आग्रह करलियै कि जरा पता करी ल॑ कि कहीं अपनऽ फ्लाईट कैंसिल त॑ नै होय गेलऽ छै ।

भारी बारिश के बावजूद हम्मं॑ सब एयरपोर्ट पहुँची गेलऽ छेलियै । एयरपोर्ट पहुँचला प॑ पता चललै भारी बारिश के कारण मुंबई म॑ स्कूल-कॉलेज, सरकारी-प्राईवेट दफ्तर सब बंद राखै के सरकारी घोषणा जारी करी देलऽ गेलऽ छै । आरू ६ बजे खुलै वाला फ्लाईट के आठ बजे तलक भी कहीं कोय अता-पता नै छै । नै कोय उद्घोषणा नै कोनो डिस्प्ले ।

उड़ान रद्द हुयै के अंदेशा छेलै । लेकिन सवा आठ बजे पक्का होय गेलै कि उड़ान रद्द नै होतै । खाली गेट नं. बदली गेलै आरू हम्मं॑ सब थोड़ा देर म॑ विमान केरऽ अंदर छेलियै । लेकिन अधिकतर उड़ान रद्द होय गेलऽ रहै । हम्म॑ सब आठ बजे के बजाय लगभग ११ बजे दिल्ली पहुँचलियै । दिल्ली म॑ छेलै कड़कड़्ड़ुआ रौदा । १० बजे स॑ सड़क परिवहन और राजमार्ग मंत्रालय म॑ मीटिंग रहै । वहाँ पहुँचत॑-पहुँचत॑ डेढ़ घंटा लेट होय गेलऽ रहै । लोगें पतियाय नै रहलऽ छेलै कि हम्म॑ सब केतना मुश्किल झेली कट वहाँ पहुँचलऽ छियै । हुनका सब क॑ लगलै जेना कि कोनो बहाना बनाय रहलऽ छियै ।

मीटिंग थोड़ा लंबा ही खींची गेलऽ रहै । तब॑ तक हमरा सब के मुंबई वापसी के समय होय गेलऽ रहै । हुन्न॑ स॑ लौटै लेली साँझ केरऽ ६ बजे केरऽ फ्लाईट छेलै । नतीजतन मीटिंग के बीच म॑ ही माफी माँगतें हुअ॑ निकलै ल॑ परलै कि एयरपोर्ट भी पहुँचना छै पाँच बजे तलक ।

लौटै घड़ियाँ लगलै कि अब॑ त॑ हालत ठीक होय गेलऽ होतै मुंबई म॑ । लेकिन तनी शक भी होय रहलऽ छेलै । कैन्हें कि  सड़क परिवहन और राजमार्ग मंत्रालय केरऽ ठीक बगल म॑ अवस्थित प्रेस ट्रस्ट ऑफ इंडिया केरऽ  न्यूज डिस्प्ले म॑ साफ-साफ लौकी रहलऽ छेलै कि मुंबई एयरपोर्ट केरऽ मुख्य रनवे अभी तलक बंद ही छै ।

दिल्ली स॑ हमरऽ फ्लाईट एक घंटा देर स॑  ७ बजे खुललै आरू मुंबई एयरपोर्ट केरऽ सरंग प॑ साढे आठ बजे पहुँची चुकलऽ रहै । लगलै अब॑ त॑ तनी देर म॑ लैंडिग होतै आरू ओकरऽ कुछ देर बाद घऽर प॑ रहबै । लेकिन होना कुछ और ही छेलै । हवाई जहाज केरऽ कप्तान न॑ घोषणा करलकै कि मुंबई म॑ उतरै केरऽ अनुमति नै मिली रहलऽ छै । ई लेली जों अगला १०-१५ मिनट तक अनुमति नै मिललै त॑ निकट केरऽ अहमदाबाद म॑ जाय क॑ उतारलऽ जैतै । ई घोषणा स॑ यात्री सब म॑ खलबली मच॑ लागलै ।

लोगऽ सब के परेशानी साफ लौकी रहलऽ छेलै । विमान परिचारिका स॑ पानी माँगी-माँगी क॑ पियै वाला के संख्या अचानक स॑ बढ़ी गेलऽ रहै । लगभग डेढ़ घंटा केरऽ प्रतीक्षा के बाद घोषणा होलै कि जहाज मुंबई एयरपोर्ट प॑ लैंडिंग करी रहलऽ छै । लैंडिंग के बाद भी जहाज क॑ टैक्सीवे तलक पहुँचै म॑ आधा घंटा लगी गेलै ।

कुल मिलाय क॑ ऐसनऽ लगलै कि स्थिति केकरो नियंत्रण मं॑ नै छै । मुख्य रनवे बंद रहला स॑ ई सब परेशानी होय रहलऽ छेलै आरू वजह बारिश क॑ बनैलऽ जाय रहलऽ छेलै । स्पाईस जेट केरऽ जे विमान ३६ घंटा पहिन॑ मुख्य रनवे प॑ फिसली क॑ कादऽ म॑ जाय क॑ फँसी गेलऽ रहै वू अखनी तलक वहीं फँसलऽ छेलै । नतीजतन, सब क॑ परेशानी होय रहलऽ छै कैन्हेंकि छोटऽ-बड़ऽ, लोकल-इंटरनेशनल सब तरह केरऽ जहाज क॑ उतरै लेली सेकेंडरी रनवे क॑ उपयोग म॑ लानलऽ जाय रहलऽ छेलै ।

लगभग ७५ फ्लाईट कैंसिल करलऽ गेलै । बहुत बड़ऽ संख्या मं॑ फ्लाईट क॑ मुंबई के जगह प॑ या त॑ अहमदाबाद, बड़ौदा नै त॑ हैदराबाद दन्न॑ उतारै ल॑ मोड़लऽ गेलै । ई घटना ई तथ्य क॑ उजागर करी दै छै कि आपात काल म॑ भी एयंरलाईंस आरू एयरपोर्ट मैनेजमेंट केरऽ प्रदर्शन आरू प्रबंधन कोन हद तलक गिरलऽ आरू ढीला-ढाला हुअ॑ सकै छै ।