मुंबई । आय भोरे अबु-दाभी केरऽ अस्पताल म॑ दुनिया केरऽ सबस॑ मोटऽ आरू भारी रहलऽ महिला ईमान अहमद अब्दुलाती  केरऽ निधन होय गेलै ।

गौरतलब छै कि ईमान अहमद अब्दुलाती क॑ बेरियाट्रिक सर्जरी लेली ई साल फरवरी म॑ मिस्र स॑ मुंबई लानलऽ गेलऽ छेलै । मुंबई केरऽ सैफी हॉस्पिटल म॑ करीब दू महीना तलक इलाज चललऽ छेलै । ओकरऽ बाद आगे केरऽ इलाज लेली ओकरऽ परिवारें ओकरा यूएई ल॑ क॑ गेलऽ छेलै ।

बेरियाट्रिक सर्जन डॉक्टर मुज्जफल लकड़वाला केरऽ कहना छै कि इमान केरऽ निधन किडनी फेल होला आऱू आंतऽ म॑ जख्म के वजह स॑ होलै ।

फरवरी म॑ इमान क॑ जब॑ इलाज लेली मिस्र स॑ मुंबई लानलऽ गेलऽ छेलै । तब॑ ओकरऽ वजन ५०० किलेग्राम स॑ भी जादा छेलै । ओकरऽ बाद मुंबई केरऽ सैफी हॉस्पिटल म॑ पहलऽ बेरियाट्रिक सर्जरी करलऽ गेलऽ रहै । सर्जरी केरऽ एक महीने के अंदर इमान के वजन २५० किलो तलक घटी गेलऽ रहै ।

ओकरऽ बाद अप्रैल म॑ सैफी हॉस्पिटल केरऽ डॉक्टर सिनी न॑ दावा करन॑ छेलै कि दू महीना तलक इलाज स॑ इमान केरऽ वजन ३२७ किलो घटी क॑ १७३ किलो रही गेलऽ छेलै । लेकिन ओकरऽ बाद ओकरऽ परिवारें ४ मई क॑ ओकरा ल॑ क॑ मुंबई स॑ यूएई चल्लऽ गेलऽ छेलै । जहाँ ओकरऽ आगू के ईलाज चली रहलऽ छेलै ।

Comments are closed.

error: Content is protected !!