करहरिया, भागलपुर : कल २० फरवरी क॑ अंगिका महोत्सव – २०१६ समारोह के आयोजन करलऽ जैतै। अबरी दाफी अंगिका महोत्सव भागलपुर जिलान्तर्गत करहरिया गामऽ के हाय स्कूल, देवी प्रसाद महतो उच्च विद्यालय करहरिया केरऽ प्रांगन मं॑ आयोजित करलऽ जैतै । एगो सादा समारोह के रूप मं॑ अंगिका महोत्सव – २०१६, २० फरवरी २०१६ क॑ ११ बजे सं॑ २ बजे तक आयोजित होतै ।

जाहन्वी अंगिका संस्कृति संस्थान, पटना आरो अंगिका.कॉम, नवी मुंबई केरऽ संयुक्त तत्वाधान मं॑ आयोजित होय रहलऽ ई समारोह मं॑ बिहार अंगिका अकादमी केरऽ माननीय अध्यक्ष सहित कईएक गनमान्य अंगिका साहित्यकारऽ सिनी के भाग लै के संभावना छै । समारोह मं॑ ४६ सालऽ सं॑ प्रकासित होय रहलऽ अंगिका भासा केरऽ मासिक पत्रिका ‘अंग माधुरी’ केरऽ ४७ वाँ बरस के प्रवेसांक के विमोचन भी करलऽ जैतै । सथं॑ अंगिका भासा के साहित्यकारऽ सिनी के उदबोधन आरो अँगिका कविता पाठ भी करलऽ जैतै ।

ज्ञातव्य छै कि पिछला लगभग ४५ सालऽ सं॑ अंगिका पुरोधा, दिवंगत डॉ. नरेश पाण्डेय चकोर द्वारा  अंगिका महोत्सव के आयोजन हर साल करलऽ जैतं॑ रहलऽ छै । अभी तलक एकरऽ आयोजन बिहार के राजधानी पटना मं॑ होय रहलऽ छेलै । ई सायद पहलऽ ऐसनऽ मौका छेकै जब॑ अंगिका महोत्सव के आयोजन पटना सं॑ बाहर अंग क्षेत्र केरऽ कोनो गामऽ मं करलऽ जाय रहलऽ छै । अंगिका मासिक, अंग माधुरी केरऽ ४६ साल तक संपादन आरो प्रकासन करै वाला अंगिका केरऽ वरिस्ट साहित्यकार दिवंगत डॉ. नरेश पाण्डेय चकोर यह॑ हाय इसकूल स॑ मैट्रिक तक के पढाय करन॑ छेला । हुनी बगल केरऽ गाँव देवधा के रहै वाला छेलाथ ।

Comments are closed.