मुंबई, 28 जुलाई, 2020 । अंगदेश केरौ बॉलीवुड अभिनेत्री कुमकुम केरौ निधन होय गेलौ छै। हुनी 86 साल के छेलै। हुनी लंबा समय सँ बीमार रहै ।

22 अप्रैल 1934 क बिहार के अंगदेश केरौ शेखपुरा में जनमलौ कुमकुम के असली नाम ज़ैबुनिस्सा छेलै । उनकौ  बाबू हुसैनाबाद के नवाब रहै । मुंबई मँ लिकिंग रोड पर कभी उनकौ बंगला  के नाँव ही कुमकुम होय छेलै । बाद मँ ओकरा तोड़ी क एगो नया बिल्डिंग बनाय देलौ गेलौ रहै ।

कुमकुम नँ पहलौ भोजपुरी फिल्म “गंगा मैया तोहे पियारी चढ़ाईबो” (1963) मँ भी अभिनय करनै रहै । वास्तव मँ कुमकुम, गुरुदत्त के खोज मानलौ जाय छै । गुरुदत्त  क अपनौ फिल्म आर पार (1954) के गाना “कभी आर कभी पार लागा तीरे नजर” के फिल्मांकन एक्टर जगदीप प करना  रहै लेकिन बाद मँ गुरुदत्त  क लगलै कि एकरा कोनो महिला पर फिल्माना चाहिय्यौ । तखनकौ समय मँ, कोय भी एतना छोटा सा गाना करै लेली सहमत नै भेलै । तबै आखिरकार गुरुदत्त नँ कुमकुम प इ गीत के चित्रण करलकै । बाद मँ गुरु दत्त नँ अपनौ फिल्म प्यासा मँ भी उनका छोटा सा किरदार  देलकै।

एक्टर जगदीप केरौ बेटा नावेद जाफरी नँ ट्वीट करी क अभिनेत्री के निधन प शोक जतैलै छै । हुनी लिखलकै- हम्में सिनी एगो आऱू मोती हेराय देलियैा।

कुमकुम नँ अपनौ करियर में लगभग 115 फिल्मों में अभिनय करलकै । हुनका मिस्टर एक्स इन बॉम्बे (1964), मदर इंडिया (1957), सन ऑफ इंडिया (1962), कोहिनूर (1960), उजाला, नया दौर, श्रीमान फंटूश, एक सपेरा एक लुटेरा में शानदार अभिनय लेली जानलौ जाय छै। हुनी अपनौ दौर के कईक स्टार्स के संग काम करी चुकलौ रहै । जेकरा मँ किशोर कुमार आरू गुरु दत्त के नाँव भी शामिल छै।

अंगिका.कॉम परिवार सौंसे अंगदेश तरफौ सँ अंगदेश केरौ अनमोल रत्न बॉलीवुड अभिनेत्री कुमकुम क भावभीनी श्रद्धांजलि अर्पित करै छै ।

Comments are closed.

error: Content is protected !!