गोड्डा : अंग लोक सांस्कृतिक नवजागरन महोत्सव उर्जानगर, महगामा मं॑ ३० मार्च क॑ आयोजित होतै । झारखंड केरऽ गोड्डा जिला केरऽ महगामा प्रखंड स्थित उर्जानगर मं॑ ई कार्यक्रम के आयोजन बिहार अंगिका अकादमी के आह्वान पर करलऽ जाय रहलऽ छै ।

बिहार अंगिका अकादमी केरऽ अध्यक्ष प्रो. (डॉ.) लखन लाल सिंह आरोही न॑ बिहार, झारखंड, पं. बंगाल केरऽ २६ अंगिका भासा-भासी जिला के अंगिका साहित्यकार, विद्वान व संस्कृति व रंगकर्मी आरनि सं॑ बड़ी भारी संख्या मं॑ एकरा मं॑ भाग लै के आग्रह करन॑ छै। कार्यक्रमऽ के आयोजक व स्वागतकर्ता डॉ. नागेश्वर राम के अनुसार कार्यक्रम के उद्घाटन प्रो. (डॉ.) लखन लाल सिंह आरोही आरू अध्यक्षता महगामा केरऽ पूर्व विधायक श्री राजेश रंजन करतै । विशिस्ट अतिथि केरऽ रूप मं॑ ति.मा.भा.वि. केरऽ प्रोफेसर डॉ. परशुराम राय प्रभाकर मौजूद रहतै ।

समारोह मं॑ मुख्य रूप सं॑ अंगिका केरऽ भासिक गरिमा पर विचार गोस्ठी, अंगिका नाटक, अंग क्षेत्र केरऽ लोक नृत्य, लोकगीत, लोकगाथा आरू अंगिका कवि सम्मेलन आरनि आयोजित करलऽ जैतै ।

Comments are closed.