स्‍टॉकहोम: अमेरिकी गीतकार व गायक बॉब डिलेन क॑ ई साल केरऽ नोबेल साहित्य पुरस्कार दै केरऽ घोषणा करलऽ गेलऽ छै । ई प्रतिष्ठित सम्मान हासिल करै वाला वू पहलऽ गीतकार छेकै । स्वीडिश एकेडमी केरऽ कहना छै कि ७५ साल केरऽ डिलेन क॑ ‘अमेरिकी गीतऽ के लंबा परंपरा मं॑ नयऽ काव्य शैली विकसित करै लेली’ नोबेल पुरस्कार देलऽ जाय रहलऽ छै ।

Bob_Dylan_-_Azkena_Rock_Festival_2010_2

बॉब डिलेन

पुरस्कार केरऽ घोषणा के कार्यक्रम म॑ मौजूद पत्रकारें सिनी न॑ हैरान होला के बाद ताली बजाय क॑ एकरऽ स्वागत करलकै । पूर्व म॑ भी नोबेल लेली गायक केरऽ नाम के अटकल लगलऽ छेलै लेकिन हुनकऽ दावेदारी क॑ कभी भी गंभीरता स॑ नै लेलऽ गेलऽ रहै । ई घोषणा स॑ पुरस्कार पर नजर जमैलऽ लोग क॑ भी हैरानी  होय रहलऽ छै ।

एकेडमी केरऽ स्थायी सचिव सारा दानियस न॑ कहलकै कि डिलेन केरऽ गाना सब  ‘कानऽ म॑ कविता जैसनऽ लगै छै ।’ ई नोबेल पुरस्कार गायक लेली सबसं॑ नया सम्मान छेकै । १९४१ म॑ मिनेसोटा केरऽ डुलुथ म॑ एगो साधारण परिवार म॑ जनमलऽ रॉबर्ट एलेन जिमेरमन उर्फ बॉब डिलेन न॑ बड़ऽ होतं॑-२ हार्मोनिका, गिटार आरू पियानो बजाना सीखी लेलकै ।

साहित्य केरऽ नोबेल पुरस्कार केरऽ घोषणा के साथ ई साल केरऽ नोबेल पुरस्कारऽ के सब्भे विजेता सीनि के सूची पूरा होय गेलै । एकरऽ पहल॑  चिकित्सा, भौतिकी, रसायनशास्त्र, अर्थशास्त्र आरू शांति केरऽ नोबेल पुरस्कार केरऽ घोषणा करलऽ जाय  चुकलऽ छै ।

ई पुरस्‍कार के तहत डिलेन क॑ लगभग ६ करोड़ २१ लाख (९२७७४० डॉलर) रुपया के राशि मिलतै ।

शांति केरऽ नोबेल पुरस्कार विजेता क॑ छोड़ी क॑ बाकी दोसरऽ विजेता सिनी क॑ १० दिसंबर क॑ स्टॉकहोम मं॑ एगो औपचारिक समारोह म॑ पुरस्कार – एगो स्वर्ण पदक आरू एगो डिप्लोमा – देलऽ जैतै ।

शांति केरऽ नोबेल पुरस्कार वह॑ दिन नॉर्वे केरऽ राजधानी ओस्लो मं॑ होय वाला एगो दोसरऽ समारोह म॑ देलऽ जैतै । ई पुरस्कार नार्वे केरऽ नोबेल समिति प्रदान करै छै ।

Source : ndtv

Photo Source : wikipedia.org

Comments are closed.