दुमका : झारखंड सरकार संथालपरगना के विकास लेली कृतसंकल्प छै । आबै वाला समय म॑ विकास के गंगा संथाल म॑ बहतै । गंगा नदी प॑ पुल, बंदरगाह, अल्ट्रा मेगा पावर प्लांट, नेसनल हाइ-वे, एम्स, हवाई अड्डा सहित कईएक बड़ऽ-बड़ऽ योजना सिनी प॑ काम चली रहलऽ छै । ई सब्भे योजना जब॑ धरातल प॑ उतरतै तब॑ संथाल म॑ आर्थिक व्यापार के मार्ग खुली जैतै । ई बात सब दुमका राजभवन म॑ आयोजित प्रेस कांफ्रेंस म॑ सीएम रघुवर दास न॑ कहलकै ।

हुनी कहलकै कि गंगा पुल के टेंडर प्रक्रिया फरवरी तलक पूरा होय जैतै । ओकरऽ बाद कोय भी दिना प्रधानमंत्री एकरऽ आधारसिला रख॑ पार॑ ।

घूमतै मोबाइल वैन

सीएम न॑ कहलकै कि सरकार न॑  लोगऽ के सिकायत केरऽ संग्रह करै लेली गांव-गांव मोबाइल वैन प्रमंडल स्तर पर भेजी रहलऽ छै ।

जल्द ही वैन केरऽ उपलब्धता के बाद 24 जिला क॑ 24 वैन उपलब्ध करैलऽ जैतै । ई वैन गांव स॑ समस्या/शिकायतऽ के संग्रह ऑनलाइन करतै आरो सोझे सरकार क॑ भेजतै । सरकार केरऽ स्तर पर ऑनलाइन कार्रवाई भी होतै ।

लंबित रेलवे प्रोजेक्ट जल्द पूरा होतै

हुनी कहलकै कि रेलवे केरऽ बहुत्ते प्रोजेक्ट झारखंड मं॑ विलंब स॑ चली रहलऽ छै । एकरा लेली हुनी रेलमंत्री स॑ बात करन॑ छै । 2016 तलक झारखंड केरऽ सब्भे लंबित रेल परियोजना पूरा करी लेलऽ जैतै, रेल मंत्री न॑ भरोसा दिलैन॑ छै ।

उपराजधानी दुमका ऐतै अस्तित्व म॑

सीएम न॑ कहलकै कि अखनी राज्य म॑ पर्याप्त संख्या मं॑ अधिकारी के कमी छै । यूपीएससी स॑ बात होलऽ छै । झारखंड क॑ पर्याप्त संख्या मं॑ अधिकारी मिलै वाला छै । अधिकारी मिलथैं दुमका उपराजधानी फुल फ्लेज्ड म॑ काम कर॑ लगतै ।  नै खाली उपराजधानी म॑ काम होतै, बल्कि सारा निर्नय भी यहाँ  लेलऽ जैतै ।

गणतंत्र दिवस प॑ लोगऽ स॑ अपील

सीएम न॑ ‘गणतंत्र दिवस’ प॑ लोगऽ स॑ अपील करलकै कि पहल॑ आजादी लेली आंदोलन, कुरबानी व संघर्स हमरऽ पूर्वजऽ व स्वतंत्रता सेनानी न॑ करलकै । आजादी के बाद अब॑ विकास लेली जनआंदोलन के जरूरत छै ।

सत्ता पक्ष आरो विपक्ष व झारखंड के जनता मिली क॑ विकास लेली पूर्वजऽ के सपना क॑ पूरा करँऽ । हुनी कहलकै कि विपक्ष भी सत्ता के अंग होय छै, ई लेली विपक्ष भी राज्य केरऽ समेकित विकास म॑ साथ द॑ । ई अवसर प॑ मंत्री डा लोइस मरांडी, प्रधान सचिव सुनील वर्णवाल, पीआरडी केरऽ डिप्टी डेयरेक्टर अजय नाथ झा आरनि भी मौजूद रहै ।

Comments are closed.