भागलपुर। बटेश्वर गंगा पंप नहर परियोजना केरऽ उद्घाटन २० सितंबर क॑ मुख्यमंत्री नीतीश कुमार करतै । ई परियोजना केरऽ उद्घाटन होला स॑ भागलपुर केरऽ अलावा पड़ोसी जिला गोड्डा केरऽ मेहरमा आरू ठाकुर गंगटी केरऽ किसानऽ क॑ सिंचाई केरऽ सुविधा मिलतै ।

बर्ष १९८० स॑ चली रहलऽ ई परियोजना बीच केरऽ बरसऽ म॑ पूरा तरह स॑ ठप्प छेलै । बर्ष २०१० स॑ फेरू स॑ काम प्रारंभ भेलै । तब॑ स॑ काम चली रहलऽ छै । ई परियोजना स॑ करीब ५० हजार हेक्टेयर भूमि म॑ सिंचाई केरऽ सुविधा मिलतै। जेकरा म॑ नौ-नौ हजार हेक्टेयर भूमि गोड्डा केरऽ मेहरमा व ठाकुरगंगटी म॑ परै छै । ई क्षेत्र म॑ गंगा केरऽ पानी खेतऽ म॑ पहुँचतै । ई योजना क॑ पूरा करबाबै लेली कहलगांव केरऽ विधायक सदानंद सिंह न॑  कईएक बार सदन म॑ आवाज उठैल॑ छै । १९८० म॑ शुरू होलऽ ई परियोजना ३८० करोड़ के छेलै, जे अब॑ ८०० करोड़ स॑ भी अधिक के लागत के होय गेलऽ छै ।

कहलगांव केरऽ विधायक सदानंद सिंह न॑ कहल॑ छै कि मुख्यमंत्री ११ बजे एनटीपीसी केरऽ हैलीपेड पर उतरतै।  उद्घाटन कार्यक्रम केरऽ तैयारी पूरा करी लेलऽ गेलऽ छै । शारदा पाठशाला म॑ मुख्यमंत्री के सभा होतै। ओकरऽ बाद मुख्यमंत्री फेज वन आरू टू गंगा पंप नहर परियोजना केरऽ शुभारंभ करतै। कहलगांव केरऽ विधायक सदानंद सिंह के अलावा आरू प्रमुख मंत्री आदि भी मौका पर मौजूद रहतै।

Comments are closed.

error: Content is protected !!