भागलपुर: केंद्र सरकार नमामि गंगे योजना के तहत गंगा के साफ-सफाय करलऽ जैतै ।  साथ ही गंगा घाट के भी सौंदर्यीकरन करलऽ जैतै । इ योजना के तहत  भागलपुर, कहलगांव आरो सुलतानगंज तलक गंगा नदी के सौंदर्यीकरन करलऽ जैतै । गंगा नदी म॑ गिरैलऽ जाय रहलऽ कूड़ा-कचरा क॑ भी साफ करलऽ जैतै ।  केंद्र सरकार द्वारा भागलपुर, कहलगांव आरो सुलतानगंज गंगा घाट के डीपीआर बनाबै के जिम्मेवारी हैदराबाद के कंपनी आरबी एसोसिएट क॑ देलऽ गेलऽ छै । ई योजना के डीपीआर  25 जनवरी तलक बनाय क॑ केंद्र सरकार केरऽ कंपनी नेशनल मिशन पार्किंग गंगा क॑ सौंपलऽ जाना छै ।

30 जनवरी क॑ पूरे देश केरऽ चयनित राज्य केरऽ जिला सबके जेकरऽ सटलऽ गंगा छै बनैलऽ गेलऽ डीपीआर के आधार प॑ चयन करलऽ जैतै । संभावना छै कि ई योजना म॑ भागलपुर के चयन होतै । योजना म॑ तीनों जगहऽ प॑ मिलै वाला गंगा नदी क॑ पूरा तरह स॑ साफ करलऽ जैतै । एकरा मं॑ गिरै वाला गंदा पानी क॑ रोकलऽ जैतै । गंगा किनारे के बेरिकेडिंग होतै । घाटऽ के पक्कीकरन, रौसनी के व्यवस्था आरो सवदाह गृह के निर्मान करलऽ जैतै । योजना लेली कंपनी द्वारा डीपीआर बनाबै के काम सुरू होय गेलऽ छै ।

आयुक्त अवनीश कुमार सिंह केरऽ अनुसार भागलपुर, कहलगांव आरो सुलतानगंज तलक गंगा के पूरा तरह सं॑ सफाई, किनारे मं॑ बेरीकेडिंग, रोसनी, घाटऽ के पक्कीकरन, धोबी घाट आरो सवदाह के निर्मान केंद्र सरकार केरऽ नमामि गंगा योजना के तहत करलऽ जैतै । ई काम हैदराबाद के कंपनी आरबी एसोसिएट क॑ देलऽ गेलऽ छै ।  25 जनवरी तलक डीपीआर बनाय क॑ भेजी देलऽ जैतै ।  30 जनवरी क॑ डीपीआर के आधार प॑ चयन के अनुमति मिली जाय के संभावना छै ।

Comments are closed.