भागलपुर : अब॑ दूरदर्शन सं॑ अंगिका मं॑ कार्यक्रम के सीधा प्रसारन करलऽ जैतै ।झारखंड केरऽ देवघर मं॑ उच्च क्षमता के मिनी दूरदर्शन केंद्र बनला स॑ इ संभव हुअ॑ पारतै ।एकरा बनाबै के प्रस्ताव प्रसार भारती केरऽ मुख्य कार्यकारी अधिकारी जवाहर सिरकार न॑ केंद्र सरकार क॑ भेजन॑ छै । संताली व अंगिका भासा आधारित कार्यक्रमऽ क॑ बढ़ावा दै के उद्देश्य स॑ सांसद निशिकांत दुबे न॑ प्रसार भारती क॑ 13 फरवरी 2015 मं॑ ही पत्र भेजी क॑ देवघर मं॑ दूरदर्शन केंद्र बनाबै के आग्रह करन॑ रहै ।

 हुनकऽ इ पत्र के आलोक मं॑ प्रसार भारती न॑ देवघर मं॑ मिनी दूरदर्शन केंद्र बनाबै के प्रस्ताव तैयार करी क॑ सरकार केरऽ सैद्धांतिक स्वीकृति लेली भेजी देन॑ छै । दूरदर्शन केंद्र बनाबै मं॑ कुल 32.17 करोड़ के खर्च होतै । एकरऽ  प्राक्कलन भी तैयार करी लेलऽ गेलऽ छै ।
जवाहर सिरकार न॑ सांसद क॑ पत्र भेजी क॑ बतैन॑ छै कि सरकार के सैद्धांतिक मंजूरी मिलथैं प्रोग्रामिंग आरो परियोजना के कार्यान्वयन प॑ गतिविधियऽ पर तत्काल काम शुरू होय जैतै । काम शुरू करै लेली तत्काल 2.59 करोड़ के राशि के जरूरत पड़तै । वर्तमान म॑ देवघर म॑ 100 वाट एफएम क्षमता वाला एलपीटी केंद्र संचालित होय रहलऽ छै ।

 

Comments are closed.