भागलपुर। तिलकामांझी भागलपुर विश्वविद्यालय केरऽ कुलपति डॉ. नलिनी कांत झा न॑ शुक्रवार क॑ आंतरिक प्रशासनिक कमेटी केरऽ गठन करल॑ छै ।

कमेटी केरऽ अध्यक्ष कुलपति होतै । कमेटी म॑ सदस्य के रूप म॑ रजिस्ट्रार, विकास पदाधिकारी, एफओ, डॉ. क्षमेंद्र कुमार सिंह, डॉ. निहाल, प्रो. पवन कुमार पौद्दार, डॉ. बसंत झा आरू डॉ. योगेंद्र क॑ शामिल करलऽ गेलऽ छै । ई कमिटी विवि म॑ होय वाला आतंरिक कार्य क॑ पूरा करै म॑ कोनो तरह के परेशानी होला प॑ एकरऽ समाधान तलाशै के काम करतै । कर्मचारियऽ व अधिकारियऽ के बीच परस्पर संवाद कायम करतै जेकरा स॑ यहांकरऽ कार्य सुचारू रूप स॑ चल॑ सक॑ ।

ई बीच तिलकामांझी भागलपुर विश्वविद्यालय स॑ जुड़लऽ एगो आरू खबर आबी रहलऽ छै कि एकरऽ अंगीभूत कॉलेजऽ म॑ कार्यरत स्थायी प्राचार्य अब॑ ६२ वर्ष म॑ ही सेवानिवृत होय जैतै । ई आशय केरऽ पत्र सरकार केरऽ अपर सचिव न॑ विश्वविद्यालय केरऽ कुलसचिव क॑ भेजल॑ छै । विवि प्रशासन अब॑ एकरऽ हार्ड कॉपी के आबै के प्रतिक्षा करी रहलऽ छै । पत्र के समीक्षा करला के बाद जे भी प्राचार्य एकरऽ दायरा म॑ ऐतै ओकरऽ सेवानिवृत करलऽ जैतै । समाचार छै कि ई आदेश के चलत॑ टीएनबी, मारवाड़ी आदि कॉलेज केरऽ प्राचार्य केरऽ सेवाकाल प्रभावित हुअ॑ सकै छै ।

Comments are closed.

error: Content is protected !!