अहमदाबाद । पीएम नरेंद्र मोदी आरू जापान केरऽ प्रधानमंत्री शिंजो आबे न॑ अहमदाबाद म॑ भारत केरऽ पहलऽ बुलेट ट्रेन केरऽ शिलान्यास करलकै। प्रधानमंत्री नरेंद्र मोदी केरऽ ड्रीम प्रोजेक्ट बुलेट ट्रेन स॑ जहाँ एक दन्न॑ अहमदाबाद स॑ मुंबई के दुरी ७ घंटा के बजाय लगभग २ घंटा म॑ पूरा करलऽ जैतै । वहीँ एकरा स॑ हजारऽ लोगऽ लेली रोजगार के अवसर भी बनतै। उम्मीद करलऽ जाय रहलऽ छै है कि ई हाई स्पीड ट्रेन कॉरिडोर केरऽ निर्माण स॑ ४००० डायरेक्ट जॉब्स आरू कम स॑ कम २०००० इनडायरेक्ट जॉब्स केरऽ मौका बनतै। बुलेट ट्रेन परियोजना स॑ एकरऽ आसपास केरऽ इलाका मे॑ औद्योगिक व शहरी विकास क॑ भी बढ़ावा मिलतै । साथ ही जापान केरऽ सहयोग स॑ बनी रहलऽ दिल्ली-मुंबई औद्योगिक गलियारा ‘डीएमआईसी’ म॑ निवेश व औद्योगिक ईकाइयऽ के स्थापना भी तेज होतै।

जापान ई प्रॉजेक्ट लेली काफी कम ब्याज दर पर फाइनेंस द॑ रहलऽ छै । एकरऽ बड़ऽ भाग यानि 88 हज़ार करोड़ रुपया भारत क॑ जापान स॑ कर्ज़ के तौर पर मिली रहलऽ छै,जेकरा प॑ 0.1 फ़ीसदी के ब्याज भारत क॑ चुकाय ल॑ होतै । ई लोन जापान क॑ ५० साल म॑ वापस करना छै, साथ ही जेकरा म॑ १५ साल केरऽ ग्रेस पीरियड भी मिलतै।

ई हाईस्पीड बुलेट ट्रेन केरऽ किराया विमान केरऽ किराये स॑ सस्ता होतै । बुलेट ट्रेन म॑ दू श्रेणी – एक्जीक्यूटिव आरू इकोनॉमी – केरऽ सीट होतै । उम्मीद करलऽ जाय रहलऽ छै कि एकरऽ किराया राजधानी एक्सप्रेस केरऽ किराये केरऽ आसपास होतै। मुंबई स॑ अहमदाबाद के बीच केरऽ ५०८ किलोमीटर के बीच ट्रेन केरऽ अधिकतम गति ३५० किलोमीटर प्रति घंटा होतै । लेकिन संचालन गति ३२० किलोमीटर प्रति घंटा रखलऽ जैतै । ५०८ किलोमीटर लंबा ई परियोजना केरऽ ९२ फीसदी हिस्सा यानि ४६८ किलोमीटर एलीवेटेड होतै । परियोजना के तहत बुलेट ट्रेन 21 किलोमीटर समुद्र के नीचें सुरंग म॑ दौड़त॑ जे देश म॑ पहलऽ बार होतै । ५०८ किलोमीटर लंबा ई रेल मार्ग प॑ कुल १२ स्टेशन होतै जेकरा म॑ चार महाराष्ट्र म॑ आरू आठ गुजरात म॑ होतै । जेकरा म॑ मुंबई, ठाणे, विरार, बोईसर, वापी, बिलिमोरा, सूरत, भरूच, वडोदरा, आनंद, अहमदाबाद आरू साबरमती शामिल छै । ई ट्रेन स॑ मुंबई स॑ अहमदाबाद केरऽ सफर महज २ घंटा म॑ पूरा करलऽ जैतै।  सरकार केरऽ लक्ष्य अहमदाबाद-मुंबई बुलेट ट्रेन क॑ देश केरऽ ७५ वाँ स्वतंत्रता दिवस के मौका प॑ १५ अगस्त, २०२२ क॑ शुरू करना छै ।

Comments are closed.

error: Content is protected !!